Emri i Faton Hajrizit është i njohur për opinionin kosovar. Ai është rikthyer në vëmendje të mediave, pasi është arratisur para pak ditësh nga burgu dhe tashmë ndodhet në arrati. Hajrizi ndonëse po kërkohet nga autoritetet e Kosovës, s’ka ngurruar që të futet në rrejte sociale dhe të qëndrojë për orë të tëra “live”.
Duke e parë gjithë debatin që është ndezur rreth emrit të Faton Hajrizit, nëna e tij, Shehrije Hajrizi, ka kërkuar realizimin e një interviste në FRONTAL të T7, për të treguar siç thotë ajo, ato që djali i saj Faton Hajrizi ka përjetuar qysh në vitet 2000, kur Kosova administrohej nga UNMIK-u, shkruan Gazeta Express.
“Le të dinë opinioni për vuajtjet e Fatonit këtu, por edhe në burgun e Mitrovicës. Por në pamundësi me shku atje, erdhëm këtu..”, thotë Shehrije Hajrizi derisa futet bashkë me autorin e emisionit FRONTAL, Arsim Lani, në burgun e Prishtinës, ku Faton Hajrizi kishte qëndruar disa herë, disa muaj.
Teksa i ofrohet qelisë ku Hajrizi kishte qëndruar e ku nëna e tij e kishte vizituar, Shehrije Hajrizi thotë se asnjëherë s’e ka përjetuar mirë kur ka ardhur ta vizitojë dhe se edhe gjatë realizimit të intervistës ka emocione të rënda.
